"गौं कु स्यू ग्वेर दादा"

गौडी भैंसियों से भरयां रौंदा छाजू चौक गुठियार

कख हरची ह्वेळी दादु, गुठयारै बाखरियों की स्या डार।
फलाणु दादा कन लगांदू छौ बीच खोला बटी धै
तौं गोरु-बाखरों जंगलू हांडा, डांडियों घाम अछैन्दू हपार ।।

कखी लोग अफु-2 करी की अपणा गोर चरांदा छा
पर कै-कै गौं मा लुकारा पांत्या भी रख्या रांदा छा ।
देख्दा-देख्दी जंगलू मा, ह्वे जांदू छौ घांडियों कु घमणाट
खेल-खेल मा जंगलू मच जांदू छौ छोरों कु किकलाट ।।

गौं कु रतनु दादा घौर गयूं, छोड़ी की गोर तौंका सारा
पर छोरा मस्त ह्वेयाँ खेल मा, कैका गोर ? जूत्ता मारा ।
रतनु दादा कु एक ब्लद बघन कुमच्यारा दुमकी याली
अर खौलू बाद मा मासू तैकु, खून चुसिकी बाघन छोड़ी याली ।।

हल्कू-2 जब अन्ध्यरु लैगी होण, दादा ऐगी अपणा ब्लदू लैण
पर मिलणा नी छा तौंसणी ब्लद, जु द्वी छोरा गया छा गोर लैण ।
बाकी गोर-बाखरों लैकी, जब छोरा तपड मा पौंछि गैनी
रतनु दादन जोर करी पूछी, अबे छोरो मेरा ब्लद बाघन त नी खैनी ।।


रतनु दादा की बात सुणी की, छोरों का हड़गा काँपी गैनी
अबे छोरों ! क्या यांकू तुमारा भौरोसा मेरा ब्लद छोड्या रैनी ।
गोर बाखरा घौर छोड़ी, फिर छोरा वापस जंगल ब्लदू ढूंढ ऐनी
अर ब्लदू की ढूंढ मा झाड़ियों पेट अफु-2 कैकी कुचै गैनी ।।

ढूंढदा-ढूंढदी एक ब्लद त मिलेगी चरदू सड़की का धोरा
पर तबारियों दादा चिल्लेगी, ब्लद बाघन मारेली बे छोरा ।
दादा गुस्सन तिलबिलैगी! अब मीन बाघ मान्न, मैंमा बोलीगी छौ
आज मैमा बस याद बची छन, दादा बरषु पहली दुनिया छोडिकी चलगी छौ।।

# दिगम्बर डंगवाल